Kosova përfiton 21.5 milionë euro nga Gjermania

Kosova do të përfitojë edhe 21.5 milionë euro nga Gjermania, prej tyre 13.5 milionë janë hua dhe 8 milionë grante

Paratë në fjalë do të investohen në disa sektorë, si infrastrukturë, zhvillimin e qëndrueshëm ekonomik, hartimin e reformës së administratës publike, si dhe për themelimin e Fondit për Sigurimin e Depozitave në bankat e Kosovës.

Duke filluar nga ky vit, me këto para do të investohet përmirësimin e rrjetit dhe transmisionit dhe zhvillimin e sektorit të energjisë, themelimin e një qendre të aftësimit profesional, modernizimin e trajnimit dhe sistemit ligjor dhe ngritjen e kapaciteteve për Gjykatën Kushtetuese, si dhe ngritjen e kapaciteteve të Komisionit për Buxhet dhe Financa në Kuvendin e Republikës së Kosovës.

Ndërkaq me 5 milionë euro do të financohet themelimi i Fondit për Sigurimin e Depozitave në bankat e Kosovës.

Mbështetja financiare është zyrtarizuar me nënshkrimin e dy marrëveshjeve që janë arritur ndërmjet Ministrisë së Financave dhe Republikës Federale të Gjermanisë, përkatësisht përfaqësuesve nga KfW Banka për Zhvillim.

Zëvendësministri i Financave, Ramadan Avdiu e ka mirëpritur arritjen e marrëveshjeve të reja me Gjermaninë, duke e cilësuar këtë hap si vazhdim të marrëdhënieve të shkëlqyeshme mes shteteve.

Pas nënshkrimit të marrëveshjeve ambasadori i Gjermanisë në Kosovë, Ernst Reichel theksoi se shteti gjerman nuk është i fokusuar që të jetë i pranishëm në Kosovë vetëm në aspektin politik, por të jap mbështetje në të gjitha fushat e jetës, në mënyrë që të ketë zhvillim dhe të përmirësohet jeta e qytetarëve.