Asnjë gjurmë nga fëmijët shqiptarë

Tashmë një vit, shqiptarja 27-vjeçare Anila Nela, me vendbanim në Wels të Austrisë, ende nuk i ka parë fëmijët e saj Isën (6) dhe Mirjetën (4). Pasi martesa e dhunshme ishte shkurorëzuar, Gjykata austriake ia kishte dhënë të drejtën për përkujdesje nënës, ndërsa babai së shpejti zhduket me fëmijët, pa lënë ndonjë gjurmë.

Familja shqiptare e babait të fëmijëve, i cili është i pajisur me shtetësi austriake, ka jetuar rreth 20 vite në rrethinën e Wels-Land. Gjatë vitit 2004, ai ishte martuar me shqiptaren Anila Nela dhe e dërgon ate në vendlindjen e re. Jetën në familjen myslimane shqiptare, gruaja shqiptare e përshkruan si në burg: „Unë nuk guxoja jashtë familjes me askend të flas, nuk guxoja të punoja e as të mësoja gjuhën gjermane.

Unë duhej të kujdesesha vetëm për shtëpinë dhe fëmijët“, rrëfen për „Nachrichten“ austriake, shqiptarja 27-vjeçare. Duke u përpjekur në emancipimin e saj, konflikti i saj me burrin dhe vjehrrit zgjerohej gjithnjë e më shumë.

Në muajin maj të vitit 2008, asaj i merren dokumentet dhe nga anëtarët e familjes dërgohet në vendlindjen e vjetër shqiptare. Në muajin nëntor të të njëjtit vit, Anila arrin të kthehet në Austri dhe të vendoset në një strehimorë të grave në Wels, ku e merr ndihmën e duhur juridike, më pas gjen punë dhe banesë personale.

Pas largimit të gruas, burri ka parashtruar në Gjykatë kërkesën për të fituar të drejtën për përkujdesje ndaj fëmijëve, me arsyetim se bashkëshortja e tij e kishte „lënë“. Në vendimin e Gjykatës, përshkruhet qartë karakteri i martesës së dhunshme të gruas në një rreth të dukshëm islamik tradicional të Kosovës, në të cilin martesa nuk ishte aspak e lumtur.

Pak ditë para marrjes së vendimit gjyqësor në lidhje me dhënien e të drejtës për përkujdesje ndaj fëmijëve, në vjeshtën e vitit të kaluar, shqiptari ishte zhdukur me fëmijët pa lënë asnjë gjurmë. Aktualisht, policia është duke hetuar në lidhje me rrëmbimin e fëmijëve, ndërsa hetimi përmes Interpolit, nuk ka dhënë rezultate të duhura.