Kosova meriton të hyjë në procesin e liberalizmit

Qeveria e Kosovës në bashkëpunim me Komisionin Evropian, ka identifikuar një listë prej 21 projektligjeve që duhet miratuar

Kosova tash e meriton procesin e liberalizimit të vizave, pasi që është plotësuar korniza legjislative me anë të së cilës do të përmbusheshin kriteret për këtë process.

Në takimin e shtatë të Këshillit ministror për integrime evropiane kryeministri i Thaçi, në fjalimin e tij hyrës ka paraqitur të arriturat e institucioneve në punën e tyre për procesin e integrimeve evropiane.

Ai ka thënë se në fushën e liberalizimit të vizave, Qeveria në bashkëpunim të ngushtë me Komisionin Evropian ka ndërmarrë të gjithë hapat e nevojshëm, me qëllim të përmbushjes së kritereve për marrjen e strategjisë për liberalizimin e vizave.

Qeveria e Kosovës në bashkëpunim me Komisionin Evropian, ka identifikuar një listë prej 21 projektligjeve që duhet miratuar deri në publikim e raportit të progresit 2011.

Finalizimi i tri programeve të bashkëpunimit ndërkufitar me Shqipërinë, Malin e Zi dhe Maqedoninë, të cilat do të fokusohen në zbatimin projekteve konkrete që do të përmirësojnë jetën e qytetarëve, sipas kryeministrit janë ndër projektet e tjera, të cilat do ta ndihmojnë Kosovën në integrimet evropiane.

Në kuadër të këtij takimi udhëheqësit e ministrive kanë prezantuar situatën aktuale dhe ngecjet eventuale në miratimin e projektligjeve dhe zbatimin e masave implementuese.