Shteti serb do të hyjë në obligime për t’ia kompensuar borxhet që ia ka shkaktuar Kosovës

Shefja e ekipit të Prishtinës në bisedimet ndërmjet Kosovës dhe Serbisë, Edita Tahiri, është optimiste se më 20 dhe 21 korrik, me ndihmën e ndërmjetësit të BE-së, Robert Cooper, do të arrihen edhe katër marrëveshje të reja me palën serbe.

Ajo ka paralajmëruar se në “pakon e re”, pritet  të hyjnë marrëveshjet për telekomunikacionin, energjinë, tregtinë e lirë dhe regjistrat kadastralë. “Nëse pala serbe pajtohet me propozim-marrëveshjet që tashmë janë përgatitur, atëherë shteti serb do të hyjë në obligime për t’ia kompensuar borxhet që ia ka shkaktuar Kosovës, për afro 12 vjet rresht, përmes shfrytëzimit të linjave të transmisionit energjetik” ka thënë Tahiri.

Zv.kryeministrja nuk ka saktësuar se sa është vlera e dëmit të shkaktuar deri tashti nga shteti fqinj, por ka thënë se shifrën e saktë do ta nxjerrë një ekip i veçantë i ekspertëve të fushës së energjetikës.