Gjykata Federale: Burgu hetues, i lejuar edhe për fëmijët 10-15 vjeçarë

Edhe ndaj fëmijëve të moshës 10 deri 15 vjeçare në raste dyshimi për vepra penale të kryera, mund të vendoset, përjashtimisht, masa e burgut hetues

Gjykata Federale e Zvicrës, si autoriteti suprem në sferën e gjyqësisë zvicerane ka marrë një vendim sipas të cilit edhe ndaj fëmijëve të moshës 10 deri 15 vjeçare në raste dyshimi për vepra penale të kryera, mund të  vendoset, përjashtimisht, masa e burgut hetues.

Si shkas për këtë vendim ka shërbyer një rast që ka ndodhur në Gjenevë, transmeton albinfo.ch agjencinë zvicerane të lajmeve sda.ch. Atje, në vitin 2014 një djalë 12 vjeçar nga Rumania ishte shpallur fajtor për vepra të ndryshme penale, veç tjerash edhe për tentim vjedhjeje.

Por, atij nuk i ishte shqiptuar asnjë dënim. Gjyqtari për të rinj kishte vendosur në aktgjykimin e tij se ligji nuk parasheh dënime me heqje lirie për të rinjtë nën moshën 15 vjeçare. Për këtë arsye, edhe burgu për hetime (paraburgimi) që kishte mbajtur ai, kishte qenë i paligjshëm.

Por, mendim të ndryshëm lidhur me këtë ka Gjykata Federale me seli në Lozanë, përcjell albinfo.ch. Sipas saj, burgu hetues ndaj 12 vjeçarit ka qenë në rregull pasi që ai nuk kishte pasur letërnjoftimi me vete ndërsa prindërit e tij ndodheshin në Rumani dhe ekzistonte rreziku i ikjes së tij nga Zvicra.