Të huajt në Zvicër, të sjellin dëshmi se nuk janë nën hetime

Kantoni i Tiçinos e ka tashmë në veprim këtë procedurë, dhe kërkon nga të huajt që të dëshmojnë me një vërtetim se nuk janë në hetime. Por, përmes iniciativës, ky kanton synon që ta legjitimojë praktikën e vet

Keystone

Të huajt të cilët kërkojnë leje qëndrimi ose vetëm leje për të punuar si punëtor i jashtëm në Zvicër nga zonat kufitare duhet t`u ofrojnë autoriteteve dëshminë se nuk janë nën hetime. Ky propozim i Kantonit të Tiçinos është përshëndetur nga Komisioni për politika shtetërore i Dhomës së Kantoneve, shkruan srf.ch.

Deputeti i CVP-së nga kantoni i përmendur, Filippo Lombardi e ka vërtetuar për agjencinë e lajmeve SDA se komisioni e ka votuar këtë iniciativë me 6 vota pro dhe 5 kundër. Shumicën e ka siguruar vota e kryetarit të komisionit, Peter Föhn nga SVP/UDC.

Kantoni i Tiçinos e ka tashmë në veprim këtë procedurë. Në fakt, ai kërkon nga të huajt që të dëshmojnë me një vërtetim se nuk janë në hetime, përcjell albinfo.ch. Por, përmes iniciativës, ky kanton synon që ta legjitimojë praktikën e vet.

Ajo kërkon që enti të ketë të drejtë që pa asnjë arsyetim dhe në mënyrë sistematike  të kërkojë informacione lidhur me hetimet eventuale që mund të kenë pasur të huajt e vendeve të BE-së të cilët kërkojnë leje qëndrimi në Zvicër.