Rritje e madhe e numrit të papunëve me kohë të gjatë

Janë 90.000 persona që kërkojnë punë prej një viti e më gjatë. Dhe, kjo shifër është 40 mijë më shumë, ose 80 për qind në krahasim me vitin 2008

Ndërkohë që numri i përgjithshëm i personave të regjistruar si të papunë në Zvicër vazhdon të jetë i ulët (3.2%), ka shënuar një rritje të madhe numri i atyre që janë të papunë prej një kohe të gjatë. Kështu, siç shkruan gazeta “Schweiz am Sonntag”, papunësia “e gjatë”, ka arritur në një nivel rekord vitin e fundit.

Janë 90.000 persona që kërkojnë punë prej një viti e më gjatë. Dhe, kjo shifër është 40 mijë më shumë, ose 80 për qind në krahasim me vitin 2008, viti kur kishte shpërthyer kriza e madhe financiare botërore. Gazeta e raporton këtë gjendje mbështetur në të dhënat e ekspertit të tregut të punës nga qendra për studime konjunkturale e Universitetit ETH të Cyrihut (KOF), Michael Siegenthaler, transmeton albinfo.ch.

Nga ana tjetër, fakti se niveli i papunësisë në Zvicër është stabil, pra nuk shkon përtej 3.2%, shpjegohet me atë se shumë nga ata që janë të papunë për kohë të gjatë, nuk paraqiten fare në zyrat për ndërmjetësim të punës (RAV).