Gratë duhet të presin edhe 170 vjet për t`u barazuar me burrat!

Sipas një studimi të realizuar nga Forumi Ekonomik Botëror (WEF), të titulluar “Gender Gap Report”, gratë do të barazohen me burrat në sferën e punësimit vetëm pas 170 viteve!

Burrat mund të flenë rehat. Së paku këta të sotmit dhe bijtë e nipat e tyre. Sepse barazia e grave me ta duket se i takon një të ardhmeje të largët. Sipas një studimi të realizuar nga Forumi Ekonomik Botëror (WEF), të titulluar “Gender Gap Report”, gratë do të barazohen me burrat në sferën e punësimit vetëm pas 170 viteve!

Sipas studimit të përmendur, përpjekjet për të “rrafshuar” pabarazinë mashkull-femër në sferën e punës, janë duke u ngadalësuar në mënyrë dramatike, shkruan spiegel.de. Dallimi për vitin 2016 është vlerësuar me 59 për qind. E kjo do të thotë se gratë në fushën ekonomike kanë më shumë se  përgjysmë më pak shanse se sa burrat, transmeton albinfo.ch Dhe për të hequr këtë dallim, me ritmin e sotëm, nevojiten edhe 170 vite! Ndërsa para një viti ishte vlerësuar se nevojiteshin “vetëm” 118 vite.

Raporti i përmendur i WEF publikohet për çdo vit nga viti 2005 dhe merret me vlerësimin e shanseve të njerëzve sipas gjinisë në fusha të ndryshme.

Raporti aktual ka hulumtuar 144 vende dhe ka konstatuar se në 68 vende është përmirësuar gjendja sa i përket barazisë gjinore ndërsa në 74 është keqësuar.

Në të gjitha kategoritë, vendin e parë për pozitën e gruas e zë Islanda, madje për të tetin vit me radhë, përcjell albinfo.ch. Pas saj vijnë me radhë: Finlanda, Norvegjia, Suedia dhe Ruanda. Ndërsa Gjermania është në vendin e trembëdhjetë.