Suva heq dorë nga detektivët për zbulimin e abuzimit me sigurimin

Si masë e menjëhershme pas një vendimi të Strasburgut Suva ka vendosur që të mos urdhërojë më raste të reja të observimit përmes detektivëve

Suva, Zyra Federale për sigurim nga aksidentet do të heqë dorë përkohësisht nga angazhimi i detektivëve për zbulimin e keqpërdoruesve, shkruan sda.ch. Këtë veprim ajo është detyruar ta marrë pas vendimit të Gjykatës Evropiane për Mbrojtjen e të Drejtave të Njeriut në Strassburg. Kjo gjykatë i ka dhënë të drejtë një qytetareje 62 vjeçare të Cyrihut e cila ishte ankuar për sulm mbi të drejtën e privatësisë, transmeton albinfo.ch. Gjykata ka konstatuar se Zvicrës i mungon baza e mjaftueshme ligjore për të bërë përgjimin e të siguruarve.

Kështu, ajo e ka gjykuar si shkelje të të drejtës për jetë private angazhimin e një detektivi privat për të përgjuar gruan në fjalë, që ka qenë viktimë e një aksidenti.

Rastin e ka konfirmuar Suva sot me një komunikatë ku ka deklaruar se e ka pranuar njoftimin për këtë vendim nga Strasburgu. Dhe, si masë e menjëhershme Suva ka vendosur që të mos urdhërojë më raste të reja të observimit përmes detektivëve, përcjell albinfo.ch. Ajo dëshiron që njëherë të analizojë vendimin dhe të shqyrtojë me kujdes konsekuencat e mundshme. Pas kësaj Suva do të vendosë për veprimet e mëtejshme.

Deri më tash Suva ka angazhuar detektivë privatë në raste të veçuara. Brenda vitit ata janë angazhuar në 10 deri 15 raste. Ndërsa gjatë vitit 2015 Suva kishte shpallur si të dyshimta 574 raste të të siguruarve nga pasojat e aksidenteve.

Që nga koha kur e ka filluar angazhimin e detektivëve privatë, Suva, sipas të dhënave të saj, ka kursyer 117 milionë franga.