Fshati ku prehet Aleksandër Moisiu zgjidhet më i bukuri në Zvicër

Në varrezën e fshatit, në një lartësi të konsiderueshme prehet trupi i aktorit të madh shqiptar Aleksandër Moisiu. Nga vendi ku është varri i tij duket si në pëllëmbë të dorës liqeni dhe gjithsesi, edhe fshati më i bukur i Zvicrës, Morcote.

Në Zvicrën e vendeve të panumërta të bukura, pamjeve panoramike me male të larta e liqene të kaltra, me një gjelbërim të thellë, të dallosh një vend si më të bukurin, nuk është punë aspak e lehtë. Megjithatë, një anketë online në nivel nacional të Zvicrës ka provuar të gjejë fshatin më të bukur në vend, shkruan srf.ch.

Në konkurrencë kanë qenë 12 fshatra me më pak se 3000 banorë (ky ka qenë kusht) ndërsa në finale patën mbetur katër sish, secili nga njëri regjion gjuhësor i Zvicrës.

Dhe, fitues i garës me mbi 31 mijë votues për herë të dytë është shpallur fshati idilik buzë liqenit të Luganos, Morcote, në pjesën italiane të Zvicrës.

Për ne, shqiptarët fshati Morcote është interesant dhe pak a shumë i njohur edhe për një gjë: në varrezën e fshatit, në një lartësi të konsiderueshme – atje të çojnë më shumë se 400 shkallë – prehet trupi i aktorit të madh me prejardhje shqiptare Aleksandër Moisiu, shkruan albinfo.ch. Nga vendi ku është varri i tij duket si në pëllëmbë të dorës liqeni dhe gjithsesi, edhe fshati më i bukur i Zvicrës, Morcote.

Varreza njihet edhe për kishën e njohur Santa Maria dell Sassa që është në atë kompleks dhe e cila sot është një atraksion turistik për arkitekturën e saj të veçantë.

Edhe artistë tjerë kanë zgjedhur Morcoten si vendin e tyre të prehjes së fundit

Në mesin e katër finalistëve janë zgjedhur edhe fshatrat: Ardez në Unterengadin, Binn në Oberrwallis dhe qyteza mesjetare St. Ursane në kantonin Jura.