Menaxherët e firmave zvicerane fitojnë më së shumti në Evropë

Pagat e menaxherëve të korporatave të mëdha zvicerane janë më të lartat në Evropë. Mesatarisht, shefat e shtatë koncerneve zvicerane, të cilat janë të përfshira në top 100-shin e ndërmarrjeve, kanë fituar vitin e kaluar 8.77 milionë euro.

Kjo është një rritje prej gati 15 për qind në krahasim me vitin 2014, siç tregohet në një studim nga firma konsulente „Towers Watson Willis“.

Prapa zviceranëve më të paguar vijnë spanjollët me 7.18 milionë euro. Pastaj vijnë britanikët me 6.78 milionë euro para gjermanëve, të cilët kanë inkasuar 5 milionë euro.