3.2 për qind ka qenë shkalla e papunësisë gjatë gushtit

Shkalla e papunësisë në gusht ka qenë 3.2 për qind, për 0.2% më e lartë se në gushtin e vitit të kaluar, gjegjësisht në entet për kërkim të punës kanë qenë të regjistruar 142.858 veta

Gjatë muajit gusht në Zvicër është shënuar një rritje simbolike e numrit të të papunëve. Krahasuar me periudhën e njëjtë të një viti më parë, gjatë gushtit 2016 ka pasur një rritje prej 0.2 për qind, njoftojnë autoritetet përgjegjëse, transmeton albinfo.ch. Kështu, shkalla e papunësisë në gusht ka qenë 3.2 për qind, gjegjësisht në entet për kërkim të punës kanë qenë të regjistruar 142.858 veta.

Ndërkohë që shkalla e papunësisë e llogaritur së bashku për të gjitha kategoritë e qytetarëve ishte 3.2 për qind, ajo e të rinjve ishte dukshëm më e lartë, 3.7 për qind. Por, krahasuar me gushtin e vitit të kaluar, përqindja e të rinjve të papunë ka mbetur e pandryshuar.

Te personat mbi 50 vjeçarë shkalla e papunësisë është më e ulët se mesatarja e përgjithshme. Vetëm 2.7 për qind të njerëzve më të vjetër se 50 vjeç janë të regjistruar si të papunë dhe kjo përqindje nuk ndryshon nga ajo e vitit të kaluar.