Propozohet një formë e zbutur e “përparësisë së vendorëve”

komisioni për politikë shtetërore ka prezantuar sot një formë më të butë ose «light» të përparësisë së vendësve në krahasim me të huajt

Në përpjekje për të gjetur një kompromis në mes të kërkesës strikte të SVP-së për përparësinë që sa i përket punësimitz u duhet dhënë vendësve dhe obligimeve që Zvicrës i dalin nga marrëveshja me BE për lirinë e lëvizjes, komisioni për politikë shtetërore ka prezantuar sot një formë më të butë  ose «light» të përparësisë së vendësve në krahasim me të huajt.

Kryetari i këtij komisioni, Heinz Brand nga SVP ka folur para mediave për arritjen e një kompromisi në mes të këtyre dy tendencave, njoftojnë mediat zvicerane.

Sipas komisionit, Këshilli Federal në një hap të parë do të parashohë masat e nevojshme për shterrimin e fuqisë punëtore të vendit, transmeton albinfo.ch. Në një hap të dytë pastaj do të vendosej një detyrim ligjor për njoftimin me numrin e vendeve të lira të punës, në momentin kur migracioni të ketë tejkaluar një prag  të caktuar.

Në rast se këto masa nuk do të sjellin rezultatin e pritur, Këshilli Federal mund të marrë «Masa përkatëse ndihmëse». Ato, patjetër duhet t`i prezantohen komisionit të përzier. Komisioni duhet t`i miratojë ato masa në rast se nuk janë në përputhje me Marrëveshjen për lëvizjen e lirë.

Në këtë mënyrë, komisioni synon të mos i rrezikojë marrëveshjet bilaterale me BE-në.

Dhoma Nacionale e Parlamentit të Zvicrës do ta shqyrtojë këtë çështje në javën e dytë të sesionit të saj vjeshtor.

Ndërkaq, iniciativa kundër migrimit masiv, e votuar nga populli më 9 shkurt 2014 kërkonte që Zvicra të vendoste një sistem kontingjentesh për të punësuarit nga jashtë dhe për dhënie të qartë të përparësisë punëtorëve vendës, përcjell albinfo.ch. Afati për zbatimin e iniciativës ishte 3 vjet, që do të thotë se ajo duhet të fillojë të veprojë në shkurt të vitit 2017