Rekord: Mbi 5 milionë të angazhuar me punë në Zvicër

Termi “i angazhuar” në këtë rast përfshin jo vetëm të punësuarit me status të rregullt e me kontratë pune por të gjithë ata mbi 15 vjeçarë që në çfarëdo mënyre janë të lidhur me punën

Në tremujorin e dytë të këtij viti shifra e të angazhuarve me punë në Zvicër ka kaluar për herë të parë 5 milionëshin, shkruan srf.ch. Saktësisht, sipas Zyrës Federale për Statistikë Zvicra në fund të qershorit ka numëruar 5 milionë e 33 mijë të angazhuar. Koncepti “i angazhuar” sipas definicionit ndryshon nga ai “i punësuar”, sqaron albinfo.ch.

Termi “i angazhuar” në këtë rast përfshin jo vetëm të punësuarit me status të rregullt e me kontratë pune por të gjithë ata mbi 15 vjeçarë që në çfarëdo mënyre janë të lidhur me punën. Të tillë janë ata që punojnë edhe vetëm një orë në javë ose që ndihmojnë prindërit në ekonomitë familjare, në bujqësi apo edhe që ndjekin mësimet për zanat.

Rritja e numrit të të angazhuarve në krahasim me periudhën e njëjtë të një viti më parë ka qenë 1.6%.

Nga ana tjetër, gjatë kësaj periudhe ka pasur rritje po ashtu edhe të numrit të atyre që kanë humbur statusin e të angazhuarit me punë. Ky numër është rritur për 8000 veta duke u ndalur në kuotën 208000, përcjell albinfo.ch. Përqindja e të papangazhuarve kështu ka arritur në 4.3%.