Zvicra jep 11.11 milardë në emër të ndihmës për zhvillim

Por nuk është miratuar plani që deri në vitin 2028 Ndihma për Zhvillim të arrijë në 0.7 për qind të brutoprodhimit vendor

Fondi i Ndihmës për Zhvillim që Zvicra u jep vendeve të varfra do të ketë për katër vitet në vijim,11.11 miliardë franga në dispozicion. Për lartësinë e kësaj shume ka vendosur Komisioni për Politikë të Jashtme i Dhomës së Kantoneve (Senatit) të Parlamentit të Zvicrës, shkruan sda.ch.

Me këtë qëndrim ajo ndjek vendimin e marrë më herë nga Dhoma Nacionale e Parlamentit, në të cilën vendimi qe marrë me një diferencë të vogël votash pro, përcjell albinfo.ch. Kjo për shkak se i gjithë grupi parlamentar i SVP/UDC-së kishte qenë për të reduktuar këtë fond ndërsa këtij grupi i qenë bashkuar edhe pjesëtarë të FDP/PLR-së.

Ndërkaq në komisionin e përmendur të Senatit, kjo shumë gjegjësisht kornizat për kreditë, kanë qenë të pakontestueshme, bëjnë të ditur shërbimet brenda parlamentit.

Nga ana tjetër, nuk ka arritur të krijojë shumicë plani që deri në vitin 2028 Ndihma për Zhvillim të arrijë në 0.7 për qind të brutoprodhimit vendor. Shuma për të cilën është arritur pajtimi, pra 11.11 miliardë franga, përbën vetëm 0.48 për qind të prodhimit të përgjithshëm vendor të Zvicrës.