Edhepse autori i sulmit në tren ka vdekur, hetimet kundër tij vazhdojnë!

Kur një i akuzuar vdes gjatë kohës deri sa ndaj tij zhvillohet procedurë penale, një zhvillim i tillë zakonisht çon në ndërprerjen e procedurës së hetimeve. Por në këtë rast bëhet përjashtim

Rasti i sulmit që ndodhi të shtunën në një lokalitet të kantonit St.Gallen e i cili la pas vetes 2 të vdekur dhe 5 të plagosur, është një rast sui generis në Zvicër. Për këtë arsye edhe trajtimi që do t`i bëhet nga drejtësia, do të jetë i veçantë.

Kështu, dhe pse autori i sulmit ndërkohë ka vdekur, megjithatë hetimet ndaj tij do të bëhen edhe më tej nga prokuroria e rastit.

“Kur një i akuzuar vdes gjatë kohës deri sa ndaj tij zhvillohet procedurë penale, një zhvillim i tillë zakonisht çon në ndërprerjen e procedurës së hetimeve”. Kështu ka thënë për Agjencinë e Lajmeve SDA Roman Dobler, zëdhënës i prokurorisë së St. Gallenit, përcjell albinfo.ch. Por, ka sqaruar ai më tutje, në rastin e ri kjo gjë nuk luan fare rol gjegjësisht nuk ka fare ndikim.

Sipas gjendjes aktuale, pas kryerjes së aktit nuk do të duhej të zhvillohej procedurë gjyqësore pasi që autori i sulmit, dorai nuk mund të ballafaqohet me veprën e kryer, transmeton albinfo.ch. Por megjithatë do të praktikohet informimi i qytetarëve në lidhje me njohuritë rreth rastit, sapo të jenë përmbyllur hetimet, ka thënë Dobler.

Ndryshe, lajmet lidhur me rrethanat e sulmit vazhdojnë të vijnë shumë të kursyera. Mediat zvicerane njoftojnë se dorasi, me emrin e shifruar Simon, ka punuar në një lokalitet në Principatën e Lihtenshtajnit ndërsa paralelisht ka ndjekur edhe studimet në një shkollë të lartë në Buchs të Kantonit St. Gallen.