Fillojnë kampionatin me nderimin për viktimën e Munihut, Armela Segashi

Me një transparent të madh që e kanë shpalosur para fillimit të lojës në Pipinried si mysafir, i kanë shprehur ngushëllime familjes Segashi

Futbollistët e klubit Landsberg që bën gara në Ligën e Bavarisë e kanë filluar kampionatin me një gjest prekës. Ata me një transparent të madh që e kanë shpalosur para fillimit të lojës në Pipinried si mysafir, i kanë shprehur ngushëllime familjes Segashi.

Siç dihet tashmë, Armela Segashi, vajza 14 vjeçe ka humbur jetën në atentatin e bërë muajin e kaluar në Munih dhe tashmë është varrosur në Kosovë, përcjell albinfo.ch atë që shkruajnë mediat gjermane. Armela është motra e Arbnor Segashit, lojtarit të klubit Pipinsried.

Trajneri i klubit ia ka lënë Arbnorit që të vendosë për angazhimin e tij në ndeshjen e parë, dhe lojtari me prejardhje nga Kosova ka vendosur të luajë në 11-shen e parë.

Pas një minute heshtjeje, ndeshja ka filluar.

Disa orë para kësaj, në Munih është zhvilluar një ceremoni mortore kushtuar viktimave, me pjesëmarrjen e familjarëve të viktimave dhe përfaqësuesve të shtetit, transmeton albinfo.ch. Kardinali dhe ipeshkvi i Munihut Reinhard Marx së bashku me peshkopin evangjelist Heinrih Bedford-Strohm kanë drejtuar ceremoninë kishtare në katedralen e Munihut.