Një komunë zvicerane anulon koncertin e këngëtarit nacionalist kroat “Thompson”

Këngëtari Perkovic, emri i të cilit “Thompson” ka domethënien e armës me këtë emër, me të cilën ai kishte luftuar në vitet `90, konsiderohet si nacionalist i cili himnizon regjimin fashist të ustashëve dhe propagandon kundër serbëve

Sapo kemi pasur lajmin për ndalimin që një komunë zvicerane i bëri koncertit të një këngëtari nacionalist serb, një ndalesë e tillë iu shqiptua edhe këngëtarit kontrovers kroat Marko Perkovic, të njohur si “Thompson”, njofton agjencia e lajmeve sda. Vendimi ka ardhur nga këshilli komunal i Schlierenit, qytetit të Kantonit të Cyrihut, në të cilin koncerti ishte planifikuar të mbahej më 3 shtator.

Siç ka bërë të ditur Këshilli i qytetit të Schlierenit të premten, ky vendim është marrë për shkak të prezencës së madhe të pritshme mediale dhe për shkak të reagimeve negative, transmeton albinfo.ch. Lidhur me vendimin është informuar edhe organizatori i koncertit, gjegjësisht menaxheri i sallës ku do të mbahej koncerti.

Bashkë me koncertin, është ndaluar në të njëjtën kohë edhe e gjithë “Nata kroate”, aktivitet ky në kuadër të të cilit duhej të performonte Thompson.

Këngëtari Perkovic, emri i të cilit “Thompson”  ka domethënien e armës me këtë emër, me të cilën ai kishte luftuar në vitet `90, konsiderohet si nacionalist i cili himnizon regjimin fashist të ustashëve dhe propagandon kundër serbëve.

Në vitin 2009 Zyra Federale e Policisë (Fedpol) i kishte ndaluar Perkovicit hyrjen në Zvicër, përcjell albinfo.ch.  Por ndërkohë ai sërish qe lejuar, kështu që në dhjetor të vitit 2015 ai qe paraqitur në një koncert të mbajtur në Friburg . me atë rast organizatorët ia kishin kontrolluar përzgjedhjen  e këngëve.

Organizata e të Rinjve Socialistë (Juso) e kishte cilësuar këngëtarin si “armik të shoqërisë së lirë dhe demokratike”. Në një letër të hapur të para një jave, Juso kishte kërkuar nga qyteti dhe kantoni që të anulojnë koncertin.