Zvicra rrit shpenzimet në sferën e ndërtimit

Për ndryshim nga sektori privat, federata, kantonet dhe komunat i kanë rritur për 9.3 për qind shumat e investuara në projektet e tyre për ndërtime të reja

Ndërtimtarët në Zvicër gjatë vitit 2015 kanë shpenzuar më shumë mjete për projektet e tyre të ndërtimit se sa një vit më parë. Kështu, siç bën të ditur Zyra Federale për Statistikë (BFS), shpenzimet në këtë fushë gjatë vitit që shkoi kanë pasur një ngritje nominale prej 1.4 për qind në krahasim me vitin 2014, shkruan srf.ch.

Madje, nëse merren parasysh shkalla e inflacionit që ka qenë në vitin 2015, rritja e shpenzimeve në fjalë ka qenë për 1.8 për qind, transmeton albinfo.ch.

Më tutje BFS në statistikën e saj të përkohshme për ndërtimtarinë njofton se në sektorin privat, gjatë vitit 2015 për herë të parë në tetë vitet e fundit janë investuar më pak para në projekte të reja ndërtimi. Për ndryshim nga sektori privat, federata, kantonet dhe komunat i kanë rritur për 9.3 për qind shumat e investuara në projektet e tyre për ndërtime të reja.