Vera sjell më shumë azilkërkues në Zvicër

Në qershor 2300 emigrantë kanë paraqitur kërkesë për azil në Zvicër. Kjo është rreth një e katërta më shumë se në muajin maj. Gjithnjë e më shumë njerëz janë kapur në kufi duke ia mësyrë Zvicrës.

Në muajin maj ishin regjistruar rreth 1.900 kërkesa azili. Në javët e fundit gjithnjë e më shumë emigrantë kanë hequr dorë nga një kërkesë për azil. Lea Wertheimer nga Sekretariati Shtetëror për Migrim (SEM) thotë se numri i kërkesave për azil nuk korrespondon me të njëjtën masë si ndalimet në kufi. „Kjo do të thotë se njerëzit në mënyrë të qartë nuk duan në Zvicër të aplikojnë për azil”, përcjell albinfo.ch.

Javën e kaluar në kufirin jugor rreth tri të katërtat e të gjithë emigrantëve kanë hequr dorë nga kërkesa për azil në Zvicër. Ata kërkonin të ktheheshin në Itali që ndoshta më shpejt të bëjnë sërish përpjekje të kalojnë transit nëpër Zvicër.

Fakti që numri i azilantëve është rritur nga maji deri në qershor ka të bëjë me sezonin.

Deti Mesdhe është më i qetë dhe shumë njerëz guxojnë të marrin rrugën nëpër det. Në përgjithësi, që nga janari dhe në fund të qershorit 14.277 njerëz kanë kërkuar azil, nga të cilët 5962 në tremujorin e dytë.

Por, krahasuar shifrat me vitin e kaluar, shifrat e azilit janë dukshëm më të ulëta. Në qershor të vitit 2015 janë pranuar rreth 3800 aplikacione. Në atë kohë emigrantët e parë mbërritën pasi ishte mbyllur rruga e Ballkanit.