Kantonet kërkojnë më shumë leje pune për ekspertët nga vendet e treta

Kantonet me ekonomi të fuqishme si Bazeli, Cyrihu dhe Gjeneva kërkojnë nga federata që t`u mundësohet të sjellin në Zvicër më tepër specialistë nga vendet jashtë BE-së

Foto ilustrim

Nevoja për kuadro që ka ekonomia zvicerane nuk arrin të plotësohet nga zviceranët dhe shtetasit e BE-së, të cilët praktikisht janë të barazuar me vendësit sa i përket punësimit. Kështu, Zvicra duhet që vazhdimisht të kërkojë ekspertë nga vendet e treta, për çka nevojitet sigurimi i lejeve dhe vizave të punës.

Nisur nga këto vështirësi, kantonet me ekonomi të fuqishme si Bazeli, Cyrihu dhe Gjeneva kërkojnë nga federata që t`u mundësohet të sjellin në Zvicër më tepër specialistë nga vendet jashtë BE-së, shkruan “Nzz am Sonntag”.

Më konkretisht, drejtorët për ekonomi të këtyre kantoneve kanë kërkuar nga Këshilli Federal që numri i lejeve të qëndrimit dhe të punës për këto kategori të rritet nga 6500 sa është tash në së paku 8500, transmeton albinfo.ch. Kjo kërkesë mbështetet në interesin ekonomik.

“Mungesa e lejeve përkatëse për ekspertët nga vendet e treta rrezikon aftësinë konkurruese të ekonomisë zvicerane”, ka thënë shefi për ekonomi në ekzekutivin e Bazelit, Christoph Brutschin. Në rast të vazhdimit të kufizimeve të tilla, kompanitë zvicerane mund të braktisin pjesërisht Zvicrën duke bartur projekte dhe reparte të tyre jashtë vendit, përcjell albinfo.ch.

Siç dihet, për ndryshim nga qytetarët e BE-së, ata të vendeve të treta duhet t`u nënshtrohen të ashtuquajturve kontingjente kur është fjala për punësim në Zvicër.