Gjoba e parë për bartje të burka-s i shqiptohet konvertites zvicerane Nora Illi

Nora Illi nga IZSR këtë dënim e ka marrë me vetëdije madje edhe e ka provokuar atë, pasi që ka mbajtur një konferencë shtypi, e veshur me burka

Dënimin e parë për bartje të burka-s në ditën e parë kur ndalimi i saj ka hyrë në fuqi, në Kantonin e Ticinos,  e ka marrë Nora Illi, një zvicerane e konvertuar në islam. Ajo është përgjegjëse për gratë në organizatën kontroverse islamike IZSR, shkruajnë mediat zvicerane.

Ajo, siç është e nënkuptueshme, këtë dënim e ka marrë me vetëdije madje edhe e ka provokuar atë, pasi që në një shesh të qytetit Locarno, krahas krerëve tjerë tër organizatës ka mbajtur një konferencë shtypi, transmeton albinfo.ch. Dhe, kuptohet, ka qenë e veshur me burka.

Siç ka njoftuar më vonë IZSR, Illi ka marrë një dënim, të parin pas hyrjes në fuqi të ndalesës së përmendur. Siç bëhet e ditur, përveç saj, dënim ka marrë edhe shoqëruesi i saj Rachid Nikkaz, i cili konsiderohet se e ka mbështetur atë në këtë veprim, përcjell albinfo.ch. Nikkaz është bërë i njohur pasi ka marrë përsipër të paguajë të gjitha gjobat që do të shqiptohen për bartje “niqab”-it

Aty nuk bëhet e ditur lartësia e gjobës por siç ka marrë vesh 20minuten.ch bëhet fjalë për 100 deri në 1000 franga