Kryeministri serb, Vuçiq, për vizitë pune në Zvicër

Ai ka ardhur sot në Bernë, ku është pritur nga presidenti federal Johann Schneider-Ammann. Kryeministri serb takon të mërkurën sekretarin shtetëror për hulumtime, arsim dhe inovacion, Mauro Dell`Ambrogio, për të thelluar temën mbi arsimimin dual

Kryeministri serb Aleksandar Vuçiq ndodhet për vizitë pune në Zvicër. Ai ka ardhur sot në Bernë, ku është pritur nga presidenti federal Johann Schneider-Ammann. Marrëdhëniet bilaterale dhe ato ekonomike në mes të dy vendeve si dhe gjendja ekonomike në botë, kanë qenë në fokus të takimit në nivelin më të lartë zviceranoserb.

Siç bëhet e ditur në një komunikatë të presidencës, kryeministri serb ka shprehur interesim të veçantë për forcimin e bashkëpunimit me Zvicrën në fushën e arsimimit dual profesional, që është një specifikë e Zvicrës.

Presidenti zviceran, Ammann ka vlerësuar lart bashkëpunimin me Serbinë, duke përmendur në veçanti investimet direkte të Zvicrës në Shqipëri, transmeton albinfo.ch.

Kryeministri serb takon të mërkurën sekretarin shtetëror për hulumtime, arsim dhe inovacion, Mauro Dell`Ambrogio, për të thelluar temën mbi arsimimin dual. Ky takim zhvillohet në kuadrin e Kongresit të Dytë Ndërkombëtar të Arsimimit Profesional që mbahet nga 20 deri më 22 qershor në Winterthur. Vuçiq pritet të mbajë një fjalë në këtë kuadër.

Pas një uljeje gjatë periudhës së krizës financiare botërore të vitit 2008, nga viti 2012 marrëdhëniet ekonomike Zvicër-Serbi kanë njohur ngritje të vazhdueshme. Në vitin 2015 ato kanë arritur një vëllim të përgjithshëm prej 348 milionë frangash ose një rritje prej 22% në krahasim me vitin 2014. Eksportet e Zvicrës në Serbi kanë arritur në 251 milionë franga ndërsa importet nga Serbia, 97 milionë.