Të huajt në Neuchatel mund të zgjidhen deputetë dhe ministra të kantonit!

Përveç se kanë të drejtë të marrin pjesë në zgjedhje dhe në referendume, të huajt e këtij kantoni nga viti 2007 në nivel komunal mund edhe të zgjidhen në funksione

Të huajt në Kantonin Neuchatel (Neuenburg) në të ardhmen mund të kandidojnë për t`u zgjedhur në Parlamentin e Kantonit e madje edhe në Qeverinë e Kantonit. Parlamenti i këtij kantoni është deklaruar sot se të huajt, edhe pse nuk kanë pasaportë zvicerane, të fitojnë të drejtën pasive të zgjedhjes edhe në nivel kantoni, shkruan srf.ch.

Megjithëkëtë, do të jetë populli i cili me votim të drejtpërdrejtë do të vendosë nëse ky ndryshim do të futet në kushtetutë ose jo.

Kusht për pjesëmarrjen e kandidatëve të huaj për parlament dhe qeveri është që ata të kenë lejen e qëndrimit të përhershëm në Zvicër (viza C) dhe të jenë duke jetuar më së paku prej pesë vitesh në kanton, transmeton albinfo.ch

Kantoni Neuchatel (Neuenburg) ka një veçanti nga kantonet tjera. Përveç se kanë të drejtë të marrin pjesë në zgjedhje dhe në referendume (e drejtë që të huajt e gëzojnë edhe në disa kantone tjera) ata nga viti 2007 në nivel komunal mund edhe të zgjidhen në funksione.