Pagesat me kartelë mbeten ende të pazgjidhura

Problemet e pagesave me kartela Maestro dhe të tjera në Zvicër nuk janë zgjidhur ende.Trazirat sporadike po ndodhin në SIX Payment Services, ofrues terminal i pagesave me kartelë. Këto telashe janë duke shkaktuar shumë vështirësi.

Të gjitha rajonet e vendit janë të prekura. Shkaku vjen nga një problem i rrjetit, bëri të ditur të martën Stephan Meier, zëdhënës për SIX Payment Services. Me sa duket, problemi nuk vjen për shkaqe të jashtme, nga ndonjë sulm virusi.

Pagesat me kartelë kanë filluar të paraqesin probleme që nga e hëna në mëngjes. Shqetësimet pastaj janë zgjeruar në mënyrë sporadike. “Ky tip problemi identifikohet shumë qartë”, theksoi z. Meier, njofton albinfo.ch.  “Kur je, për shembull, në arkë të një supermarketi, është shumë e mundur që personi që ndodhet para jush të arrijë të paguajë me kartelë, ndërsa ju jo”.

Kjo e bën zgjedhjen e problemit më të vështirë. Tani për tani, disa zona të SIX Payment Services janë të prekura. Firma bën të ditur se teknikët janë duke punuar shumë me vështirësi për të zgjidhur problemin sa më shpejt, shtoi Stephan Meier.