Përplasen Ph. Müller me D. Burkhalter për eritrejanët

Në Parlamentin zviceran ka pasur një përplasje të ashpër mes Philipp Müller (PLR) dhe Didier Burkhalter (PLR) në dosjen e Eritresë
Parlamenti zviceran të hënën ka filluar sesionin e tretë, duke shënuar në mënyrë të veçantë një shkëmbim të ndezur mes Këshilltarit federal, Didier Burkhalter (PLR) dhe ish-kryetarit të partisë së tij, Philipp Müller.

Të mërkurën Parlamenti gjithashtu ka dhënë dritën e gjelbër për një kredi prej 438.5 milionë frangash zvicerane për të ndihmuar Gjenevën, ndërsa ekspertët janë mandatuar për të përcaktuar nëse të hyrat e parlamentarëve janë të justifikuara. Ndërsa, një ditë më parë, legjislacioni për duhanin ishte dërguar në Këshillin Federal.

Debati u animua kur tema e Eritresë u paraqit.

“Jo, problemi i eritrejanëve nuk është aq i thjeshtë”, tha ministri i Punëve të Jashtme, Didier Burkhalter, për t’iu përgjigjur pyetjes së kolegut të tij, Philipp Müller.
Ish-presidenti i PLR-së, Philippe Müller, kërkoi që Zvicra të negociojë me Eritrenë, në mënyrë që të kthehen më shumë qytetarë të saj. “Ne duhet të shkojmë në vend për të biseduar me ministrat e tyre, sy për sy, sepse ata nuk janë budallenj, atyre duhet t’u jepet mundësia për të folur me ne”,  pati deklaruar ai.

Dhe, aty për aty, z. Burkhalter i përgjigjet: ‘Eritreja duhet të jetë dakord, sepse ne nuk mund ta bëjmë vetëm një gjë të tillë… Unë nuk jam këshilltar federal i Eritresë. Mos u bëni  naiv… Ne nuk duam të jemi të instrumentalizuar, duhen disa kushte për një vizitë të tillë’.

Ministri pastaj tha se është i “tronditur” dhe i “zemëruar” me propozimin e kolegut të tij të partisë për të shkuar atje dhe për t’i vizituar burgjet: “Ka 10 vjet që CICR nuk arrin të hyjë në burgjet eritrejane… A jeni i vetëdijshëm për atë që po thoni? Ne duhet të shkojmë atje, të shikojmë si shkojnë gjërat, t’u japim disa milionë pa pyetur asgjë? Dhe, pastaj të pranojmë se mund t’i kthejmë njerëzit? Ka rrezik që këta njerëz të zhduken në ato burgje dhe që askush të mos dijë asgjë për ta”.