Diaspora shqiptare e Zvicrës feston me Vokrrin pranimin në UEFA dhe FIFA

Shaban Konxheli, po i pret mysafirët. Nuk është hera e parë që ai organizon evente në Diskotekën Rinora 4, një qendër e njohur argëtimi për rininë shqiptare në Zvicër.

Organizimi i së premtes ishte special jo vetëm për Shaban Konxhelin, por edhe për të gjithë shqiptarët  e Kosovës në Zvicër, të cilët po festojnë pranimin e vendit të tyre në UEFA dhe FIFA.

Festa në “Rinora 4” nuk do të kishte kuptim pa kryetarin e Federatës së Futbollit , Fadil Vokrrin, legjendën e futbollit kosovar, shkruan albinfo.ch

Ai sot është heroi më i ri i Kosovës, pasi brenda mandatit të tij Kosova u pranua në UEFA dhe FIFA.

Vokrri u bë i famshëm, të gjithë kërkonin një foto me të, por edhe me futbollistët shqiptarë të futbollit në Zvicër si Arlind Ajeti, Berat Gjimshit dhe Taulant Xhaka, të cilët kishin ardhur në Rinora4 për të festuar pranimin e Kosovës në FIFA dh UEFA..

Këta 3 lojtarë shqiptarë që luajnë në ligat zvicerane dhe evropiane aktualisht janë ndër lojtarët kryesorë edhe në kombëtaren shqiptare.

Krahas Vokrrit, i pranishëm ishte edhe nënkryetari i Komitetit Ekzekutiv të FKF-së, Agim Ademi.

Madhështore këtë festë në Cyrih e kanë bërë edhe performimi Shkollë Shqiptare të Vallëzimit ”SHOTA”, që udhëhiqet nga Agron Bajrami

Të veshur me fanella të kombëtares kosovare, ata kanë sjellë një prezantim impozant para mysafirëve të mbledhur.

Në skenë është ngjitur edhe Fadil Vokrri. Ai ka falënderuar të gjithë ata që kanë kontribuar në ndërkombëtarizimin e sportit kosovarë, sidomos shqiptarët në Zvicër.

Kur jemi te kontributi i shqiptarëve të Zvicrës, duhet përmendur edhe Flamur Bunjakun, anëtarin e komitetit së Federatës së Futbollit të Kosovës, i cili është edhe njëri ndër bashkëpronarët e Rinora4.

Festës i janë bashkuar edhe futbollistë të klubeve shqiptare, që luajnë nëpër liga të ndryshme të zvicerane, e që të gjithë duket se i janë gëzuar pranimit të Kosovës në UEFA dhe FIFA.

Aktorët e njohur të humorit , grupi “Stupcat” kanë ironizuar në fund me 3 kombëtaret e futbollit Zvicër-Shqipëri-Kosovë duke i ndërlidhur me shqiptarët e Zvicrës që pa dyshim se janë një thesar për kombëtaren shqiptare, pasi që kontingjenti më i madh futbollistik i kombëtares aktualisht është nga kampionati zviceran.

albinfo.ch