Universiteti ETH i Cyrihut, i 19-ti në botë

Nga universitetet tjera zvicerane, më së larti është radhitur universiteti politeknik i Lozanës (EFPL), gjegjësisht në vendin e 48-të

Në një ranglistë të re të universiteteve më prestigjioze të botës, Universiteti Teknik i Cyrihut ETH, radhitet në vendin e 19-të. Është interesante se në krahasim me vitin e kaluar ky universitet ka “rrëshqitur” për katër vende më poshtë por edhe kështu është universiteti i radhitur më së larti nga të gjitha universitetet e Evropës Kontinentale.

Ndërsa në Britaninë e Madhe janë dy universitetet e njohura tradicionale: Oksfordi dhe Kembrixhi ato që i dalin përpara universitetit të njohur nga Cyrihu, shkruan revista “Times Higher Education”. E universiteti që zë vendin e parë në botë në këtë ranglistë është universiteti i njohur amerikan, Harvard

Katër vendet që ETH i ka humbur këtë vit, janë zënë nga universitetet aziatike, transmeton albinfo.ch.

Nga universitetet tjera zvicerane, më së larti është radhitur universiteti politeknik i Lozanës (EFPL), gjegjësisht në vendin e 48-të.

“Times Higher Education” për përpilimin e kësaj rangliste ka anketuar më shumë se 10 mijë shkencëtarë nga 133 vende të botës.