Komuna që nuk do të strehojë refugjatë, detyrohet të paguajë 290.000 franga!

Komuna Oberwil-Lieli nga buxheti i saj duhet t`i paguajë kantonit 290 mijë franga si kompensim për mospranimin për të strehuar azilkërkues

Në kohën kur tema rreth “gogolit” të azilit po bëhet gjithnjë më preokupuese për qytetarët e Zvicrës, vendimi i një komune të vogël në Kantonin Aargau ka zgjuar interesim të veçantë. Komuna Oberwil-Lieli në një votim gjithëpopullor ka vendosur të mos pranojë azilkërkues. Për mospranim kanë votuar 579 qytetarë ndërsa për pranim, 525 sish.

E veçanta e këtij votimi ka qenë në faktin se qytetarët është dashur të përcaktohen: nëse nuk do të pranojnë vendosjen e 10 azilkërkuesve në komunën e tyre, atëherë duhet të paguajnë. Në fakt, komuna nga buxheti i saj duhet t`i paguajë kantonit 290 mijë franga si kompensim për mospranimin për të strehuar azilkërkues.

Sigurisht, punën rreth buxhetit nuk e rregullojnë qytetarët që kanë votuar por këshilli komunal, i cili duhet të vendosë për shumën që i duhet dhënë kantonit.

Pas këtij votimi të qytetarëve, kryetarja e Qeverisë së Kantonit Aargau, Susane Hochuli është shprehur se kjo që ka ndodhur në kantonin e saj është një përjashtim. Ajo në një intervistë për srf ka thënë se “është gabim të nisesh nga një dele e zezë dhe të gjykosh se e tërë tufa qenka me dele të zeza”.

Komunat e kantonit Aargau të cilat nuk duan të strehojnë azilkërkues duhet të paguajnë një paushall ditor për çdo azilkërkues. Kantoni, në fillim të këtij viti e ka ngritur këtë pagesë nga 10 në 110 franga.