530 mijë zviceranë jetojnë në “varfëri absolute”: Nuk kanë para për pushime jashtë vendit!

Gjatë vitit 2014, 9.7 për qind të zviceranëve nuk kishin mundësi të kalonin një javë pushim jashtë vendit. Te familjet me një prind kjo përqindje madje ishte 22.6%

530 mijë njerëz ose 6.6% të popullatës së gjithmbarshme të Zvicrës jetojnë në varfëri “absolute”, gjegjësisht marrin të ardhura që konsiderohen se janë nën kufirin e varfërisë. Ndërkaq mbi një milion të tjerë janë të rrezikuar të bien në këtë kategori, shkruan srf.ch., duke iu referuar  vlerësimit që ka bërë SKOS (autoriteti federal i zyrave sociale të vendit).

Por, kjo nuk e pengon Zvicrën që në krahasim me mesataren e shteteve të BE-së të qëndrojë mjaft mirë. Në vitin 2014 standardi në Zvicër ishte në vendin e tretë, pas Luksemburgut dhe Norvegjisë. Ndërsa të ardhurat mesatare në Zvicër ishin për 1.7 herë më të larta se ato në Itali dhe 1.3 herë më të larta se në Gjermani.

Megjithatë, gjatë vitit 2014 9.7 për qind të zviceranëve nuk kishin mundësi të kalonin një javë pushim jashtë vendit, transmeton albinfo.ch. Te familjet me një prind kjo përqindje madje ishte 22.6%. Ky parametër tregon  se shkalla për matjen e varfërisë në Zvicër dallon shumë nga ajo në vende të pazhvilluara… dhe se “varfëria absolute” në vendet si Zvicra duhet marrë në mënyrë relative.

Krahas lartësisë së mesatares së të ardhurave, Zvicra ka edhe dallimet më të vogla se mesatarja evropiane në mes të pagave të ulëta dhe atyre të larta. Kështu, shuma e të ardhurave të 20 për qind të njerëzve më të pasur në vend është 4.4 herë më e madhe se ajo e 20 për qind të më të varfërve, përcjell albinfo.ch. Mesatarja në Evropë ishte 5.2 herë.

Dallimet më të mëdha në këtë pikë  janë regjistruar në Serbi, Maqedoni,, Rumani dhe në Spanjë. Ndërsa më të voglat në Islandë dhe në Norvegji.