3.6 për qind të papunë gjatë marsit në Zvicër

Shkalla e papunësisë në Zvicër gjatë muajit mars, siç bën të ditur Sekretariati Shtetëror për Ekonomi, është  stabilizuar në 3.6 për qind, duke pësuar një ulje të lehtë (0-1%) në krahasim me muajin paraprak. Me 155.324 persona të regjistruar si të papunë në entet regjionale për ndërmjetësim të punës, numri i tyre është për 19.216 ose për 7% më shumë se ai i marsit të vitit 2015.

Gjatë marsit është shënuar një ulje e numrit të të papunëve në mesin e të rinjve. Në të vërtetë, janë regjistruar 18.907 të rinj si të papunë ose 1584 më pak, në krahasim me një muaj më parë, bën të ditur srf.ch. Mirëpo, në krahasim me marsin e vitit të kaluar ka një rritje prej 706 personash të kësaj kategorie.

Në janar të këtij viti ka ndodhur çregjistrimi nga lista e të papunëve e 3079 vetave. Këta persona përveç që nuk kanë punë, kanë mbaruar edhe afatin e kompensimit që enti i punës u bën atyre që kërkojnë punë.