Shaqiri ndihmon fushatën e ministres Leuthard për kursimin e energjisë

Ylli shqiptarozviceran i futbollit, Xherdan Shaqiri, edhe pse tash luan në Angli, i është gjetur afër ministres zvicerane të energjetikës, Doris Leuthardt në aksionin e saj për kursimin e energjisë elektrike.

Ministrja që vjen nga partia CVP ka lansuar së fundi një program të quajtur “Energie Challenge 2016” për të sensibilizuar popullatën për kursimin e rrymës dhe për ta bërë më popullor këtë aksion ajo ka “trokitur në derë” të Shaqirit.

Ky i fundit, i shoqëruar dhe nga disa yje tjerë, kryesisht të muzikës e të sportit, do të shëtisë në lokalitete të ndryshme të Zvicrës për të ndihmuar dhe promovuar fushatën në fjalë, transmeton albinfo.ch lajmin e publikuar sot nga të gjitha mediet zvicerane.

Krahas Shaqirit, në këtë fushtatë do të kontribuojnë edhe këngëtari i njohur i rapit, “Stress”, ish trajneri karizmatik i futbollit Gilbert Gress dhe eksperimentuesi i njohur me fluturaket me energji diellore, Bertrand Piccard.

Në prezantimin e fushatës, sot, Shaqiri ka performuar edhe duke kënduar rap me raperin e përmendur. Në kuadër të fushatës është lancuar edhe një aplikacion me këshilla për kursimin e energjisë. Me këtë aplikacion, shfrytëzuesit mund të mbledhin pikë që do të njehësohen sipas sasisë së energjisë së kursyer. Si rezultat, fituesit do të kenë biletën për një koncert të Stress-it në mjuajin tetor.

Sipas organizatorëve, Shaqiri dhe Stress-i do të marrin një honorar për disa nga prezantimet e tyre.