“Swiss” anulon për deri të hënën fluturimet drejt Brukselit

Pas sulmit terrorist të para dy ditëve në Bruksel, kompania ajrore e Zvcrës Swiss ka ndërprerë përkohësisht fluturimet drejt Brukselit. Ndërkohë ajo njofton se kjo ndërprerje do të vazhdojë deri të hënën që vjen, domethënë ajo vazhdohet deri në fund të festës së Pashkëve, njofton agjencia sda.

Por, në mënyrë që udhëtarët të kenë megjithatë mundësi të shkojnë në Belgjikë, Lufthansa, pjesë e së cilës është edhe Swiss, ka angazhuar autobusë (shuttlebus) nga Frankfurti për në Bruksel.

Ndalesa e fluturimeve për në Bruksel aktualisht vlen për gjithë kohën e festës, pra edhe për të hënën, por rifillimi i tyre varet nga zhvillimet e mëtejshme, transmeton albinfo.ch. Shtabi i krizës i kësaj kompanie është në kontakt me autoritetet e sigurisë në Belgjkë, ka thënë një zëdhënëse e «Swiss»-it.

Ndërkohë qarkullimi i trenave drejt Brukselit është normalizuar. Sipas SBB-së, të dy trenat që lidhin Bazelin drejtpërdrejt me Brukselin, po qarkullojnë sipas planit. Biletat e anuluara të trenit mund të kthehen mbrapsht ose të ndërrohen.