Pas aeroportit, shpërthim edhe në metro: Dyshohet për 21 të vdekur në dy shpërthimet

Dy shpërthime janë dëgjuar të martën në Bruksel në aeroportin Zaventem, duke rezultuar në mbylljen e terminalit. Mediat belge flasin për njëmbëdhjetë të vdekur.

Ndërkohë bëhet e ditur se edhe një shpërthim i fuqishëm ka ndodhur në një stacion të metrosë, në afërsi të selive të ndërtesës së BE-së e në Bruksel. Në këtë shpërthim kanë humbur jetën të paktën 10 persona. Mediet njoftojnë se policia ka bërë një rrethim të hekurt të këtij kuarti.

Në shpërthimin e parë, në aeroport, numri i viktimave ka qenë së paku 11.

Njëkohësisht, mediet njoftojnë për ashpërsim të masave të sigurisë dhe të kontrollit në kufijtë ndërshtetërorë në mes të Belgjikës dhe vendve fqinje.

……

Shpërthimet u dëgjuan në aeroportin e Brukselit “Zaventem” në Belgjikë të martën, pak para orës 8:00 të mëngjesit, sipas disa dëshmitarëve në faqen e cituar nga mediet belge. Deri tani thuhet se ka të plagosur, madje dhe të vdekur, ka bërë të ditur një gazetar i RTBF.

Sot në mëngjes dy bomba kanë shpërthyer në sallën e nisjes së aeroportit, ka theksuar  gazeta “La Dernière Heure”, ndërsa rrethinat janë evakuuar.

Një dëshmitar, përcjell albinfo.ch, i thirrur nga gazeta  RTBF, tregon se kishte parë disa njerëz të plagosur si dhe njerëz të cilëve u kishte rënë të fikët në sallën e nisjes përballë “Hotel Sheraton”.