I riu bie nga vetura në tunel, arrestohen dy shqiptarë

Në lidhje me aksidentin policia ka arrestuar dy të rinj, një shtetas kosovar dhe një person me shtetësi të Maqedonisë, të dy 22 vjeçarë

Foto Ilustrim

Në orët e hershme të mëngjesit të sotëm, në tunelin Gubrist (në autostradën Cyrih-Bernë) ka ndodhur një aksident në rrethana ende misterioze. Një person ka rënë nga vetura ndërkohë që shoferi i saj ka vazhduar ngasjen. I riu 23 vjeçar me shtetësi zvicerane që ka rënë ose është hedhur, ka pësuar lëndime serioze por është jashtë rrezikut për jetë, shkruajnë mediet zvicerane.

Në lidhje me aksidentin policia ka arrestuar dy të rinj, një shtetas kosovar dhe një person me shtetësi të Maqedonisë, të dy 22 vjeçarë.

Makina sipas policisë Kantonale të Cyrihut ka qenë duke ecur nga Cyrihu në drejtim të Bernës, kur papritmas është hapur dera e saj e djathtë dhe nga ajo ka rënë personi që ishte ulur pranë shoferit, transmeton albinfro.ch. Një zëdhënës i policië thotë se në tunelin në fjalë lejohet shpejtësia prej 100 kilometrash në orë ndërsa ngasësi i makinës së përmendur pak para rënies së udhëtarit ka bërë një frenim të lehtë.

Policia ka identifikuar viktimën, i cili është një zviceran 23 vjeçar nga kantoni i Bernës. Ai ka pësuar lëndime në kokë, dhe gërvishtje të ndryshme por gjendja e tij është stabile.

Dy të rinjt e arrestuar janë nga kantoni i Bernës dhe i Solothurnit.