“Iniciativa për dëbim…” hyn në fuqi nga 1 tetori i këtij viti

Në krahasim me «Iniciativën për zbatim…», e cila dështoi të votohet, kjo ka një klauzolë për rastet e rënda, që kursen nga dëbimi secondot

«Iniciativa për zbatimin e dëbimit të të huajve kriminelë» ka pësuar debakël në referendumin e mbajtur fundjavën e kaluar. Por, iniciativa që i paraprinte kësaj dhe për moszbatimin e së cilës qe iniciuar iniciativa tjetër, shumë më e ashpër, do të hyjë në fuqi nga tetori i këtij viti, raportojnë mediet zvicerane. Këshilli Federal ka vendosur sot për këtë, duke paralajmëruar se parlamenti duhet brenda kësaj kohe t`i krijojë parakushtet ligjore përkatëse.

Siç dihet, edhe «Iniciativa për dëbimin e të huajve kriminelë», e cila qe votuar në vitin 2010, është mjaft e ashpër. Dhe me hyrjen e saj në fuqi do të bëhet i mundur dëbimi i më shumë të huajve të inkriminuar se që janë dëbuar deri tash, transmeton albinfo.ch. Por, në krahasim me «Iniciativën për zbatim…», e cila dështoi të votohet, ajo ka një klauzolë për rastet e rënda. Duke shfrytëzuar atë, gjyqtarët mund të «shpëtojnë» nga dëbimi personat në situata specifike dhe secondot (të rinjtë e gjeneratës së dytë të të huajve).

Parlamenti kishte votuar qysh para një viti ndryshimin e ligjit penal dhe atë penal ushtarak për t`iu përshtatur tekstit të iniciativës së miratuar, përcjell albinfo.ch. Por ai nuk kishte hyrë në fuqi pasi që ndërkohë qe ngritur iniciativa tjetër, më e ashpër me të njëjtën temë, e cila pra, dështoi, duke u kundërshtuar nga 58.9% e votuesve.

Këshilli Federal ka vendosur hyrjen në fuqi të ligjit që mundëson ashpërsimin e praktikës së dëbimeve, më 1 tetor 2016. Ligji nuk ka efekt retroaktiv, kështu që ai i prek vetëm ata persona që kanë kryer vepra penale pas 1 tetorit 2016.