Edhe një sondazh e nxjerr të humbur Iniciativën për dëbim

Sias Gfs Bern, 49 për qind të të anketuarve do të votonin kundër iniciativës ndërsa 46 në favor të saj

Sikur të ishte votuar javën e kaluar, iniciativa për zbatimin e dëbimit do të hidhej poshtë. Këtë konstatim e ka arritur edhe sondazhi i dytë i realizuar nga instituti për hulumtimin e opinionit Gfs Bern, raportojnë mediet zvicerane. 49 për qind të të anketuarve do të votonin kundër iniciativës ndërsa 46 në favor të saj. 5% do të ishte kuota e të papërcaktuarve.

Jo më larg se sot paradite ishin publikuar të dhënat e një sondazhi të realizuar nga gazeta 20minuten (e ka transmetuar albinfo.ch), i cili i parashikonte inicativës një humbje edhe më të thellë, me 56% kundër.

Në sondazhin e bërë po nga gfsBern të realizuar në janar të këtij viti, 51 për qind kanë qenë pro dhe vetëm 42% kundër iniciativës. Kjo tregon një trend të rëndësishëm drejt humbjes së bartësve të kësaj iniciative të kontestuar, SVP-së.

Edhe shkalla e pjesëmarrjes në votim sipas këtij instituti shkon drejt rritjes, transmeton albinfo.ch. Më 28 shkurt, ditën kur votohet për 4 iniciativa të ndryshme në nivel vendi, pritet të marrin pjesë rreth 55% të qytetarëve me të drejtë vote.

Për iniciativën «Për kurorën dhe familjen-kundër dënimit martesor», do të votonin 53% pro, 38% kundër dhe 9% të papërcaktuar.

Iniciativa për ndërtimin e tubit të dytë në tunelin e Gothardit do të votohej me një shumicë prej 56% dhe kundër saj do të ishin 39% e të anketuarve, konstaton sondazhi i insttutit të përmendur.

Ndërsa një humbje të qartë do ta pësonte iniciativa kundër spekulimit me artikujt ushqimorë. Në favor të saj do të votonin 31%, kundër 54% dhe të pavendosur, 15%.