Sybille Suter Tejada, ambasadore e re zvicerane në Maqedoni

Në takimin me ambasadoren e sapoemëruar të Zvicrës, Sybille Suter Tejada, presidenti maqedonas, Gjorgje Ivanov, është shprehur i kënaqur me raportet bilaterale dhe të bashkëpunimit mes dy vendeve vitet e fundit.

“Faleminderit për mbështetjen nga Qeveria e Zvicrës, e cila me vite në Maqedoni ka realizuar projekte të shumta në fusha të ndryshme, duke kontribuar në funksionimin më të mirë të institucioneve të caktuara dhe në përmirësimin e cilësisë së jetës së qytetarëve në rajone të caktuara”, tha Ivanov.

Ambasadorja Suter Tejada vuri në dukje se më shumë se dy dekada të dyja vendet kanë marrëdhënie miqësore dhe element kryesor i marrëdhënieve dypalëshe është programi i bashkëpunimit zviceran në Maqedoni.

Në këtë drejtim, ambasadorja Suter Tejada njoftoi se vendi i saj në katër vjetët e ardhshme do të vazhdojë programin e bashkëpunimit me Maqedoninë, ku do të ndahen 71 milionë franga zvicerane.

Zvicra është donatori më i madh bilateral në Maqedoni

“Programi ynë i bashkëpunimit përqendrohet në qeverisjen demokratike dhe decentralizimin dhe në zhvillimin ekonomik. Ajo është projektuar për të mbështetur prioritetet e qeverisë maqedonase në integrimin në strukturat evropiane”, tha ambasadorja Suter Tejeda.

Sybille Suter Tejada vjen në vend të Stefano Llazaroto.  Ajo ishte shefe e Agjencisë Zvicerane për Zhvillim dhe Bashkëpunim (DEZA/SDC) në Amerikën Latine dhe Karaibe.

Presidenti i Republikës së Maqedonisë, Gjorge Ivanov sot i pranoi letrat kredenciale edhe të ambasadorëve të sapoemëruar të  Finlandës, Estonisë dhe të Irlandës.