Zvicra, numër 1 në botë për rekrutimin e talenteve nga jashtë

Zvicra ka përfituar shumë gjatë dhjetëvjetëshave të fundit nga migracioni, gjegjësisht nga ardhja në Zvicër e talenteve të reja, thuhet në studim

Zvicra vazhdon të jetë në kulmin e listës së vendeve më të suksesshme në botë sa i përket tërheqjes ose rekrutimit të talenteve nga bota. Këtë e tregon një studim i realizuar me 109 vende, të cilin e ka publikuar ndërmarrja për ndërmjetësim të personelit Adecco, në prag të Forumit Ekonomik Botëror në Davos (WEF), transmeton albinfo.ch. Objekt i studimit është mënyra se si një vend i arsimon talentet, i rekruton ata dhe se si i mban e trajton ata.

Në ranglistën e Global Talent Competitiveness (GTCI) Zvicra, për të tretin vit me radhë zë vendin e parë.

Siç thuhet në njoftimin e bërë publik nga ADECO, Zvicra ka përfituar shumë gjatë dhjetëvjetëshave të fundit nga migracioni, gjegjësisht nga ardhja në Zvicër e talenteve të reja. Kjo për shkakun se ajo është tërheqëse në shumë aspekte nga më të ndryshmet.

Në vendin e dytë të ranglistës, ashtu si dhe një vit më parë, është Singapuri, pastaj në të tretin Luksemburgu. SHBA dhe Britania e Madhe janë në mesin e dhjetë vendeve në toplistë, gjegjësisht SHBA është në vendin e katërt ndërsa Britania e Madhe në të shtatin. Por Gjermania nuk ka arritur të futet në mesin e dhjetë vendeve të para në këtë kategori, përcjell albinfo.ch. Ajo, në radhitjen e sivjetme është vetëm në vendin e 14-të.

Vendet që bëjnë pjesë në top-dhjetëshin e parë, i karakterizon hapja kundrejt mobilitetit të të talenteve, thuhet më tutje në njoftim. Kështu, në Zvicër ashtu si dhe në Luksemburg, deri në 25 për qind e popullatës janë të lindur jashtë vendit ndërsa në Singapur madje 43%.