Refugjatët e traumatizuar “vërshojnë” klinikat psikiatrike

Klinikat psikiatrike alarmojnë se janë të “vërshuara” nga pacientët të ardhur si refugjatë nga zona të ndryshme të luftës. Ata sjellin me vete shumë përjetime traumatike ndërsa pritja për trajtim zgjat shpesh deri në tetë javë

Radioja e trasmetuesit publik të Zvicrës SRF4 raporton lidhur me gjendjen në klinikat psikiatrike të Zvicrës, ku kërkojnë shpëtim një numër i madh refugjatësh.

“Ne kemi një përqindje në shtim të vazhdueshëm të refugjatëve të cilët vijnë te ne me probleme specifike”, thotë Roland Vauth, mjek kryesor për Pskiatrinë transkulturore, në klinikat universitare të Bazelit, transmeton albinfo.ch.

Muajve të fundit aty janë trajtuar gjihnjë më shumë njerëz nga Siria dhe Eritrea. Ky fluks përbën problem për klinikat psikiatrike. Disa nga klinikat kanë arritur në kufijtë e kapaciteteve të tyre.

Duke qenë se kërkesat për trajtim janë të vazhdueshme, pacientët duhet të presin deri në tetë javë për një termin. Problemi, sipas kryemjekut është se përkujdesja për refugjatët është jashtëzakonisht intensive në kuptimin e nevojës për angazhim të personelit, përcjell albinfo.ch. Shpeshherë, krahas mjekut, duhet të jetë i pranishëm edhe një përkthyes, interpretues.

Për këtë arsye Vauth shpreson të ketë përkrahje nga politika. “Do të më gëzonte shumë sikur nga ana e politikës të shihej se ne këtu kemi nevojë për resurse shtesë, që të mund ta trajtojmë siç duhet këtë fluks”, thotë ai. Shikuar nga aspekti afatgjatë, kjo do të kishte ndikim pozitiv në integrimin e refugjatëve në Zvicër.

Mjeku është i bindur se migrantët të cilët ia dalin t`i tejkalojnë përjetimet e tyre traumatike, do ta mësonin më shpejtë gjermanishten dhe kjo do të ndihmonte në procesin e integrimit.