Industria e ndërtimit përfiton nga emigrantët

Derisa fluksi i refugjatëve në Gjermani ka pasur ndikimin e vet negativ mbi ekonominë e vendit, për industrinë e ndërtimit ka qenë ndryshe. Kjo industri ka përfituar, duke siguruar vende pune për një pjesë të emigrantëve dhe duke nxjerrë fitime të mëdha për vendin.
Në Gjermani është shtuar kërkesa për apartamente të thjeshta për refugjatët, shumica e të cilëve flenë nëpër salla sporti, lokale dhe tenda. Kjo ka nxitur një ringjallje të industrisë gjermane të ndërtimit, raporton media gjermane, përcjell albinfo.ch.
Në Gjermani sektori i ndërtimit ka marrë nxitje edhe nga rritja e popullsisë në qytetet e mëdha si dhe nga interesimi në rritje i njerëzve për pasuritë e patundshme.
Kostot e ulëta të huamarrjes dhe rritja e pagave reale kanë inkurajuar shumë gjermanë për të blerë banesa dhe shtëpi, në vend të prirjes së mëparshme për të banuar në apartamente me qera.
Në sektorin publik, investimet në strehim për azilkërkuesit po mbështesin kërkesën.
Sektori publik i ka dyfishuar fondet për banesa sociale në më shumë se 4 miliardë euro deri në vitin 2019, për të përballuar kërkesat për azilkërkuesit, shumë prej tyre refugjatë nga Lindja e Mesme.
Firmat e vogla dhe të mesme që mbizotërojnë sektorin e ndërtimit të banesave në Gjermani po përpiqen t’i plotësojnë këto kërkesa në rritje.