Me pasaportë të blerë sllovene, punon në Austri

Një kosovar i moshës 31 vjeçare është zbuluar se prej më shumë se një viti është duke punuar në Austri me dokumente të falsifikuara, njofton policia e Salzburgut.

Kosovari ishte pajisur me dokumente sllovene dhe ishte duke punuar në një firmë pastrimi në Salzburg. Në shtator të këtij viti, kosovari kishte udhëtuar për në Zvicër, por atje zyrtarët zviceranë e kuptojnë se dokumentet e tij nuk janë të origjinale. Më pas kosovarin e kthejnë sërish në Austri, përcjell “albinfo.ch”.

Në fund kosovari e pranon se dokumentet sllovene i kishte blerë me një çmim prej 2 mijë eurove. Si ndaj kosovarit ashtu edhe ndaj pronarit të firmës austriake janë duke vazhduar hetimet nga policia e Salzburgut.