Si pasojë e frangut të fortë rritet papunësia në Zvicër

Gjendja në tregun zviceran të punës është përkeqësuar gjatë muajit nëntor. Shifrat e papunësisë kanë shënuar rritje në 3.4 për qind.

Sipas Sekretariatit Shtetëror për Ekonomi (SECO) deri në fund të nëntorit të këtij viti janë regjistruar një total prej 148’143 të papunë në qendrat rajonale të punësimit (RAV).

Në tetor, shkalla e papunësisë ishte 3.3 për qind ndërsa 3.2 për qind një vit më parë.

Trendi i rritjes së papunësisë do të vazhdojë edhe në vitin e ardhshëm, parashikon udhëheqësi i Drejtorisë për Punë në Sekretariatin Shtetëror për Ekonomi (SECO), Boris Zürcher.

“Kulmi do të mbrrijë në 3.6 për qind, dhe vetëm në gjysmën e dytë të vitit 2016 presim një rënie graduale”, thotë ai.

Kjo është kryesisht për shkak të frangut të fortë zviceran, i cili tani është perceptuar si një problem i vazhdueshëm, thotë  Boris Zürcher.

Një arsye tjetër për rritjen e përhershme të papunësisë është se Zvicra është  varuar nga eksporti dhe nga ekonomia ngadaltë në zonën e euros dhe rritja ngadalësuar e ekonomive në zhvillim si Kina.