94% e fëmijëve në Shqipëri e shohin të ardhmen jashtë vendit

Studimi ka nxjerrë të dhëna shqetësuese lidhur me problemet që fëmijët hasin në shkollë, në komunitet nga varfëria dhe diskriminimi

Në sytë e fëmijëve, Shqipëria nuk është një vend i bukur për të jetuar. Situata e vështirë sociale dhe ekonomike në të cilën gjenden qindra fëmijë në Shqipëri ka bërë 94% e tyre të mendojnë për një jetë më të mirë jashtë vendit.  Këto shifra kanë dalë nga një studim i kryer nga organizata “Save the Children”.

Studimi ka nxjerrë të dhëna shqetësuese lidhur me problemet që fëmijët hasin në shkollë, në komunitet nga varfëria dhe diskriminimi.

“81% e fëmijëve do të donin të kishin më shumë akses në vendimmarrje për çështje që atyre iu takojnë, ndërkohë që 60% e fëmijëve deklarojnë se ata nuk kanë pasur aspak ose pak mundësi për t’u dëgjuar nga politik bërësit; 58% e fëmijëve kanë parë fëmijë që të dhunohen fizikisht, ndërsa 34% e tyre kanë qenë viktima të bulizmit”, ka thënë Xhorda Dervishi nga kjo organizatë.

Ndërsa avokatja e Popullit, Erinda Ballanca, u bëri thirrje fëmijëve që t’i drejtohen këtij institucioni për shkeljet që ata hasin.