4 vende vendosin të bojkotojnë Eurovision-in pasi është konfirmuar pjesëmarrja e Izraelit

Pas Spanjës, Irlandës dhe Holandës, edhe Sllovenia ka njoftuar se do të tërhiqet nga gara e ardhshme. Ky reagim erdhi menjëherë pas mbledhjes së Bashkimit Evropian të Transmetuesve (EBU) në Gjenevë, ku u miratuan rregulla të reja me synimin për të “forcuar besueshmërinë dhe ruajtur neutralitetin” e festivalit.

Edhe pse disa shtete kërkuan që të mbahej një votim i posaçëm lidhur me pjesëmarrjen e Izraelit, shumica e anëtarëve u shprehën të kënaqur me ndryshimet e proponuara, duke e bërë të panevojshëm votimin, transmeton albinfo.ch.

Transmetuesi publik holandez AVROTROS deklaroi se pjesëmarrja në Eurovision, në rrethanat aktuale, “nuk përputhet me vlerat publike” të institucionit. Edhe Irlanda, Spanja dhe Sllovenia argumentuan se vendimi për të lejuar Izraelin bie ndesh me qëndrimet e tyre.

Eurovision 2026 do të mbahet në Vjenë, por eventi tashmë po përballet me një bojkot në rritje nga disa vende evropiane.