200 franga gjobë për konsumuesit e kanabisit

Nëse zbatohet në praktikë, kjo do të jetë një ngritje e gjobës në krahasim me gjendjen e tashme

Personat që do të kapen duke konsumuar produket të kanabisit, në të ardhmen duhet të dënohen me gjobë prej 200 frangash. Natyrisht, ky dënim do të vlente vetëm për ata që me vete nuk kanë më shumë se dhjetë gramë hashish ose marihuana.

Nëse zbatohet në praktikë, kjo do të jetë një ngritje e gjobës në krahasim me gjendjen e tashme.

Ky është vendimi për të cilin është pajtuar shumica në Dhomën Nacionale të Parlamentit të Zvicrës. Ndryshe nga kjo, dhoma tjetër, ajo e kantoneve, synon që dënimi për veprën e njëjtë të jetë vetëm 100 franga. Për këtë arsye, çështja sërish kalohet në dhomën e kantoneve.

Megjithatë, të dyja dhomat janë pajtuar në shumicën e pikave në lidhje me trajtimin e kësaj teme. Kështu, personat e moshës madhore, mbi 18 vjeçarë, nuk do të përballen me padi në rast se zihen duke konsumuar kanabis.