Nexhat Maloku nderohet për përkushtimin 32-vjeçar në mësimin plotësues në gjuhën shqipe në Cyrih

Në një ceremoni të organizuar në Shkollën e Lartë Pedagogjike të Cyrihut, u ndanë çmimet HSK-Comenius për kontributin në mësimin plotësues në gjuhë të huaja. Ceremonia u organizua nga Shoqata e Mësuesve të Gjuhëve të Huaja, në bashkëpunim me Drejtorinë e Arsimit të Kantonit të Cyrihut dhe SHLP Cyrih.

Ndër të vlerësuarit ishte edhe mësuesi shqiptar, Nexhat Maloku, i cili u nderua për kontributin e tij të gjatë dhe të çmuar në mësimin e gjuhës dhe kulturës shqipe në Zvicër, veçanërisht në kantonin e Cyrihut, ku ka vepruar si mësimdhënës, drejtues dhe koordinator i LAPSH “Naim Frashëri” për mbi tre dekada, transmeton albinfo.ch.

Në fjalën e tij përshëndetëse, ai përmendi rrugëtimin e nisur në vitin 1993 si mësimdhënës, më pas si drejtues i LAPSH “Naim Frashëri” dhe koordinator i saj në nivel kantonal e kombëtar.

Kontributi i tij përfshin përkthime, botime didaktike, projekte arsimore dhe seminare në Zvicër dhe më gjerë. Ai gjithashtu ka udhëhequr kurse të gjuhës shqipe për të rritur, ku mbi 800 zviceranë kanë mësuar shqip, si dhe udhëtime studimore për më shumë se 500 pjesëmarrës.

Deri më sot, në klasat ku ka dhënë mësim, janë edukuar mbi 1.700 nxënës shqiptarë. Në fund të këtij viti shkollor, ai do të dalë në pension, por do të vazhdojë të mbështesë aktivitetet e LAPSH “Naim Frashëri” në Cyrih.

https://www.facebook.com/share/p/16JR9rhkgu/