1500 të vdekur në vit si pasojë e gabimeve të mjekëve

Sipas kryetares së fondacionit për mbrojtjen e pacientëve, në Zvicër brenda vitit vdesin rreth 1500 pacientë nga ky shkak

Një gabim fatal i një mjekeje gjinekologe në spitalin e Wilit, në vitin 2007 që ka shkaktuar vdekjen e një pacienteje, i ka kushtuar mjekes me dënim me kusht dhe me pezullim nga puna.

Dënimi i shefes së repartit të gjinekologjisë është shqiptuar në qershor të këtij viti. Ajo, sipas vendimit gjyqësor kishte bërë një diagnozë të gabuar.

Mirëpo, ky dënim duket se nuk do të mbetet i vetmi. Padia tash drejtohet edhe ndaj mjekëve tjerë të këtij reparti, të cilët nuk janë angazhuar seriozisht gjegjësisht nuk e kanë shqyrtuar sa duhet rastin gjë që ka shkaktuar marrjen e veprimeve të gabuara. Për palën akuzuese mbetet e qartë se vdekja e gruas në lindje ka qenë e evitueshme.

Por vdekjet si pasojë e diagnozave të gabuara mjekësore nuk janë fare të rralla në spitalet e Zvicrës. Sipas Margrit Kessler, kryetare e fondacionit për mbrojtjen e pacientëve, në Zvicër brenda vitit vdesin rreth 1500 pacientë nga ky shkak.

Kjo, siç është shprehur Kessler në radion DRS është e barabartë me numrin e viktimave që do të shkaktoheshin me rrëzimin e dy jumbo-jetëve. Dhe, ka shtuar ajo, askush nuk i përkrah familjarët e viktimave.