10-vjeçari nga Zvicra humb jetën në një aksident në Kosovë

Aksident tragjik në Kamenicë, humb jetën 10-vjeçari shqiptar nga Zvicra

Një ngjarje e rëndë ka tronditur komunën e Kamenicës, ku një 10-vjeçar shqiptar nga Zvicra ka humbur jetën si pasojë e një aksidenti trafiku, raporton albinfo.ch.

Sipas informacioneve të konfirmuara nga Policia e Kosovës, viktima, me inicialet R.B., ndodhej në një veturë së bashku me dy kushërinj të tij, të dy të mitur. Aksidenti ka ndodhur si pasojë e mosadaptimit të shpejtësisë me kushtet e rrugës, të cilat ishin të lagështa për shkak të reshjeve të shiut.

Në raportin policor thuhet se vetura ka humbur kontrollin dhe është përplasur me një lis, duke rezultuar në humbjen e menjëhershme të jetës së 10-vjeçarit që ndodhej në sediljen e pasme.

Ndërkohë, shoferi 16-vjeçar dhe pasagjeri tjetër kanë pësuar lëndime trupore, por janë jashtë rrezikut për jetë.

Autoritetet policore kanë konfirmuar se ndaj shoferit të mitur është iniciuar procedurë e veçantë, për shkak të moshës dhe faktit se ai nuk posedonte leje për vozitje.

Ngjarja ka ndodhur gjatë qëndrimit të familjes në Kosovë, të cilët kishin ardhur nga Zvicra për pushime dhe për të marrë pjesë në një dasmë familjare, festë që fatkeqësisht u kthye në mort.

Lamtumira e fundit për vogëlushin R.B. iu dha të hënën në varrezat e fshatit Novosellë të Kamenicës, mes dhimbjes së familjarëve, miqve dhe banorëve të komunitetit lokal. /Albinfo.ch

---