Zvicra rrit eksportet e armatimit

Importueset më të mëdha të këtyre produkteve luftarake zvicerane gjatë këtyre nëntë muajve kanë qenë Danimarka dhe Gjermania

Kompanitë zvicerane që merren me prodhimin e materialeve luftarake, kanë rritur dukshëm eksportin e tyre gjatë nëntë muajve të deritashëm të këtij viti. Ende pa ardhur fundi i vitit, ato kanë eksportuar produkte të tilla me vlerë prej një gjysmë miliardi frangash. Ndërsa eksportet e materialeve luftarake gjatë gjithë vitit 2018 kishin arritur në 510 milionë franga.

Kjo shihet në të dhënat që i ka publikuar sot Sekretariati Shtetëror për Ekonomi (Seco), shkruan srf.ch.

Importueset më të mëdha të këtyre produkteve luftarake zvicerane gjatë këtyre nëntë muajve kanë qenë Danimarka dhe Gjermania.

Sikurse edhe deri tash, grupimi politik “Zvicra pa armë” (GsoA) ka kritikuar ashpër rritjen e eksportit të armatimit, transmeton albinfo.ch. Sipas tij, Zvicra duhet të promovojë paqen në vend se të nxisë konlikte dhe luftëra.

Më parë, kritikat e grupimit në fjalë dhe të qarqeve tjera pacifiste kanë pasur në fokus shitjen e armatimit zviceran në vendet e përfshira në konflikte ose në vendet ku ai armatim mund të shfrytëzohet nga palët në konflikte ushtarake.

---